الاشرف طومن باي

السلطان الملك الأشرف أبو النصر طومان باى الدوادار من قانصوه الناصرى (مات 1517) سابع عشرين و أخر سلاطين الدوله المملوكيه البرجيه اللى حكمت مصر و أخر سلطان مملوكى بوجه عام و اتشنق على باب زويلة في القاهرة لانه رفض التفريط في استقلال مصر وقاد المقاومه ضد الغزاه العثمانيين بقيادة السلطان سليم الاول. طومان باي استلم الحكم من عمه السلطان قانصوه الغوري اللي خرج بجيشه علشان يحارب الهجوم العثمانى على الشام و مات من الصدمه فى معركة مرج دابق جنب حلب في سوريا. بيعتبر الأشرف طومان باى سلطان ملحمى حارب الغزاه ببطوله و فدا لكن وقت مقاومته خانوه العربان و غدروا بيه و دلوا العثمانليه على مكانه. ليه شارع كبير باسمه في القاهره في حي الزتون.

المحتويات [تخبية]
1 معركة الريدانيه
2 المقاومة
3 النهاية
4 تشابه اسامى
5 لينكات
6 المراجع
[تعديل]معركة الريدانيه

الريدانيه منطقة قريبة من العباسية في القاهرة وحصلت فيها المعركة اللي غيرت تاريخ مصر لمدة 500 سنة جت بعد كدة. فقدت بعديها مصر استقلالها و اتحولت لمجرد ولاية من ولايات السلطنة العثمانية و ابتدت تدفع الجزية للاستانة لاكتر من خمسميت سنة. حاول طومان باي يجمع الناس و المماليك علشان يخرجو يحاربو العثمانيين بس الناس خزلوه و المماليك استهونو بالموقف. في الوقت دا بعت له السلطان سليم الاول جواب عرض عليه انه يخليه حاكم لمصر على شرط ان طومان باي يقبل تبعية مصر للسلطنة العثمانية بس السلطان الاشرف طومان باي رفض العرض دا و طلع بجيشه على الريدانية و اتحصن فيها و حفر خندق على طول الخطوط القدمانية ولما عرف العثمانيين اتفادو الدفاعات دي و راحو مباشرة على القاهرة و لحقهم طومان باي و دخل معاهم في معركة شرسة. سنان باشا الصدر الاعظم للسلطنة العثمانية اتقتل في المعركة دي على ايد طومان باي اللي كان فاكر انه السلطان سليم شخصيا. كترة العساكر العثمانيين و حسن تدريبهم مال بالمعركة ناحيتهم و هرب المماليك و العساكر اللي حوالين طومان باي و اضطر هو كمان يهرب علشان ما يقعش اسير في ايد العثمانيين.

[تعديل]المقاومة

السلطان العثماني سليم الاول مادخلش القاهرة على طول بعد ما انتصر في الريدانية لانه كان خايف من طومان باي و من جيوب المماليك و استنى تلات ايام قبل ما يدخلها يوم الاتنين 26 يناير 1517 .الموكب الكبير بتاع السلطان اترفعت فيه الاعلام الحمرا بتاعة العثمانيين و اتقدم الموكب الخليفة العباسي(اللي كان في ضيافة و حماية المماليك)و كمان شارك القضاه و العساكر في الموكب دا. بعديها بيومين في 28 يناير هجم السلطان طومان باي على العثمانيين باليل في حي بولاق و ساعده الاهالي المصريين و استمرت المعركة حوالي 3 او 4 ليالي و اتقتل فيها عساكر عثمانيين كتير لدرجة ان الناس افتكرت خلاص ان طومان باي راجع يحكم مصر و خطبوله و دعو له في صلاة الجمعة(و كانت الجوامع خطبت و دعت للسلطان سليم في الجمعة اللي قبليها) بس العثمانيين عكسو الهزيمة لنصر لما بداو يستعملو البنادق و ضربو نار على الاهالي و على المماليك و ساعتها هرب طومان باي و المماليك و طلب الاهالي العفو من السلطان سليم اللي امر بعقاب اي واحد يرفض الاستسلام. طومان باي ماستسلمش و حاول يكر و يفر و قدر يجمع الصفوف من تاني و في مرة من المرات كان ح يتقتل السلطان سليم في غزوة قرب بولاق. اخر المعارك اللي عملها طومان باي هي معركة وردان (امبابة دلوقتي) واللي انكسرت فيها شجاعة المقاومة قدام قوة العثمانيين و عددهم و تسليحهم. بعديها لجأ السلطان لشيخ من العربان اسمه حسن بن مرعي في البحيرة، بس شيخ العربان خانه وغدر بيه و بلغ عنه و اتقبض علي السلطان الاشرف طومان باي و اتحكم عليه بالشنق.

[تعديل]النهاية

المؤرخ ابن إياس اللي كان شاهد عيان على اللي حصل بيقول:

عند باب زويلة وقف موكب السلطان الأسير طومان باي.. كان بيحرسه 400 جندي من الانكشارية.. وكان متكبل فوق فرسه.. وكانت الناس في القاهرة خرجت علشان يلقو نظرة الوداع على سلطان مصر..واتطلع طومان باي لـ (قبو البوابة) فشاف حبل متعلق, فعرف أن نهايته جت.. فنزل من على الحصان.. واتقدم ناحية الباب بخطوات ثابتة.. بعدين وقف واتلفت للناس اللي احتشدو حوالين باب زويلة.. واتطلع عليهم كتير.. وطلب من الجميع أنهم يقرو له الفاتحة تلات مرات.. بعدين التفت للجلاد, وطلب منه أن يعمل بمهمته.

و جثته تنتها متعلقة تلات أيام و بعدين اندفن في قبة السلطان الغوري، وبموته انتهت دولة المماليك وسقطت الخلافة العباسية، خلصت المقاومة للسلطان سليم في مصر والشام, وبقت مصر ولاية عثمانية.