صالح الدين محمد

الملك المنصور صلاح الدين محمد ابن المظفر حاجى ابن محمد ابن قلاوون الألفى ، سلطان الدولة المملوكيه الواحد و عشرين [1] ابن الملك المظفر سيف الدين حاجى و حفيد الناصر محمد بن قلاوون. حكم مصر من سنة 1361 لسنة 1363.



الدوله المملوكيه فى أكبر توسع ليها
اتنصب سلطان على مصر بعد اختفاء عمه السلطان " ناصر الدين حسن " اللى فى الأغلب اتقتل و اتلقب بـ " الملك المنصور " فبقى اول احفاد الناصر محمد بن قلاوون اللى قعدو على عرش مصر. اختلف المؤرخين على سنه وقت تنصيبه فيهم قالو كان عنده اتناشر سنه و فيهم قالو كان عنده اربعتاششر و غيرهم قالو ستاشر.

بعد ما اختفى ناصر الدين حسن اجتمع الامرا بزعامة الأمير يلبغا و اتفقو على تنصيبه ، و بعد ما ادوله الولاء عين الأمير " يلبغا " اتابك على العسكر و الامير " قشتمر المنصورى " نايب للسلطنه.

فى عهده ما اتغيرتش حاجه و فضلت الاوضاع زى ما كانت فى عهد عمه الناصر حسن بإستثناء ان نفوذ الأمرا زاد و اتدهورت الاوضاع الاقتصاديه و الاداريه ، و ده سمح لبروز الجراكسه و مطالبتهم بالمشاركه فى الثروه و السياسه و الاداره. فى السنه الاولى من حكمه خرج الأمير " بيدمر " نايب السلطنه عن طاعة الدوله فى قلعة الجبل فى القاهره بعد ما سمع ان السلطان الناصر حسن اتقتل و شاركه فى التمرد عدد من النواب و الأمرا كان منهم " منجك " و " استدمر " و اتحصنو فى قلعة دمشق قبل ما يوصل الجيش المصرى. و لما وصل السلطان صلاح الدين محمد و الأتابك يلبغا على راس الجيش خاف الامرا و اتخلو عن نايب الشام المتمرد و راحو بعساكرهم للسلطان و ادوه ولائهم ، و ما فضلش مع " بيدمر " فى قلعة دمشق غر منجك و استدمر و دخلت القوات القلعه و اتقبض على التلاته و اترحلو على السجن ، و اتعين الأمير " على الماردينى " نايب للسلطان فى الشام.

وقت غياب السلطان فى الشام انتهزت جماعه من الطواشيه فى القاهره الفرصه و راحو مطلعين الأمير حسين أخو الناصر حسن من سجنه وملكوه عليهم لكن دبت خلافات بينهم و اتخانقو و انتهى الموضوع بترجيع الأمير حسين ع السجن.

صلاح الدين محمد ما بقاش مهتم بشئون الدوله و بقى يشرب خمره و يعمل حفلات فزعل منه الأمير يلبغا و حس انه مش حاينفع فى الحكم فإتفق مع الامرا على عزله فعزلوه بحجة " اختلال عقله " و اتحددت اقامته فى جناح فى قلعة الجبل. بيقول ابن تغرى ان سبب عزله كان انه كان بيروح يتحشر بين ستات الامرا و يهذر معاهم و ده خلى الامير يلبغا يغضب عليه.

بعد عزل صلاح الدين صلاح و تحديد اقامته اتفق الامرا على تنصيب ابن عمه " أبو المفاخر شعبان ابن الأمير حسين " اللى اتلقب بالملك الأشرف.

[تعديل]عملات صلاح الدين محمد

من ضمن اساميه وألقابه اللى إتنقشت على عملاته : " السلطان الملك المنصور صلاح الدنيا و الدين محمد بن الملك المظفر حاجى بن الملك الناصر " ، و " السلطان الملك المنصور محمد" [2].