أبو سعيد قانصوه

لسلطان الملك الظاهر أبو سعيد قانصوه من قانصوه الأشرفى قايتباى ، تالت و عشرين سلاطين الدوله المملوكيه البرجيه (الشركسيه)، قعد على عرش مصر سنة 1498 و هو عنده اقل من تلاتين سنه و استمر فى الحكم لسنة 1500. اسمه " من قانصوه الأشرفى " لإن استاذه كان الأمير " قانصوه الألفى " اللى اداه للسلطان " الأشرف قايتباى ". كان خال السلطان " الناصر محمد بن قايتباى " فكانت الناس بتسميه " خال السلطان ". المصريين فرحوا بسلطنته بسبب كرههم للناصر محمد بن قايتباى اللى حكم قبله. اشتهر بإسم " السلطان ماعرفش ".

المحتويات [تخبية]
1 قبل السلطنه
2 السلطنه
3 عملاته و ألقابه
4 المراجع
قبل السلطنه

قانصوه كان فى منصب " الدواداريه الكبرى " وقت سلطنة ابن أخته السلطان الناصر ابو السعادات. أبو السعادات كان شاب صغير عنده سبعتاشر سنه و كان مشهور بالطيش و سؤ التصرف و ضعف الشخصيه و كان بيصاحب الأوباش و الحرافيش من عامة الناس و ده اتسبب فى سؤ علاقته بالأمرا و رجال الدوله و حتى بخاله " قانصوه " اللى كان دايماً بيساعده و بيقف جنبه فى ازماته مع الأمرا. لكن الأمرا بزعامة " ازبك " و " طومان باى " (العادل) فى الأخر قرروا انهم يزيحوه فقتلوه سنة 1498 بعد ما اتفقوا مع خاله قانصوه انه يتسلطن مكانه اذا قتلوه.

السلطنه

بعد ما اتقتل ابو السعادت الامرا بايعوا خاله " قانصوه " زى ما كانوا اتفقوا معاه و اتلقب بالملك الظاهر. الأمير ازبك كان أول واحد يبايعه و يبوس له الأرض مع انه كان بيعتبر نفسه احق بالسلطنه ، فعينه قانصوه أتابك للجيش و رقى طومان باى لمنصب " الدواداريه الكبرى " اللى كانت منصبه قبل ما يتسلطن و اداله عليه كمان مناصب الوزاره و الاستداريه كمكافأه ليه على دوره الرئيسى فى الاطاحه بالسلطان ابو السعادات.

قانصوه فى الحقيقه كان مجرد سلطان بالإسم و اللى بيحكموا كانوا الأمرا اما هو فماكنش بيبت فى حاجه و اذا حد سأله عن حاجه كان بيرد يقول " ماعرفش " لدرجة ان المصريين بقوا يسموه " السلطان ماعرفش ". بيقول المؤرخ ابن إياس انه " كان مسلوب الإختيار مع الأمراء ".

الأمير طومان باى من جهته رغم المناصب اللى ادهاله السلطان قانصوه كان طمعان فى السلطنه لكن كان خايف من الأتابكى " جان بلاط " ، فإبتدا يتآمر مع نايب الشام " قصروه " المتمرد على السلطه فى مصر ، و لما عرف قانصوه باللى بيحصل انتشرت اشاعه بإنه أمر بالقبض على طومان باى و هو فى الصعيد. الإشاعه دى ، زى ما بيقول ابن إياس ، كانت السبب فى زوال سلطنة قانصوه لإن الأمرا لما سمعوا الإشاعه و صدقوها قرروا انهم يخلصوا من قانصوه فلما عرف بتدبير الأمرا هرب منهم و دخل قسم الحريم فى قلعة الجبل و اتنكر فى هدوم واحده ست و ما حدش عرف هو راح فين.

الأمرا خلعوا قانصوه سنة 1500 بعد ما حكم اكتر من عشرين شهر و اختلف الامرا على موضوع سلطنه حد جديد لكن طومان باى انحاز لجان بلاط و سلطنه ضد رغبة الأمرا و العسكر.

عملاته و ألقابه

عملات السلطان قانصوه قليله و مفيش منها غير شوية دنانير و فلس فريد من نوعه. ظهرت على العملات الألقاب دى : " السلطان الملك الظاهر أبو سعيد " و " السلطان الملك أبو سعيد ". و اتكتب دعا : " عز نصره ".