العادل طومان باي

السلطان الملك العادل أبو النصر طومان باى الأشرفى قايتباى. خامس عشرين سلاطين الدوله المملوكيه البرجيه. حكم مصر سنة 1501 و هو عنده حوالى اربعين سنه. اتلقب بالأشرفى قايتباى نسبه لأستاذه الأشرف قايتباى.

عاش طومان باى فتره طويله فى طباق قلعة الجبل فى خدمة السلطان الأشرف قايتباى اللى عتقه و رقاه لوظيفة جمدار و فضل يترقى لغاية ما بقى مدبر المملكه فى عهد السلطان " الأشرف جان بلاط ". لما حصل تمرد فى الشام بقيادة نايب الشام " قاصروه " سافر طومان باى على الشام و انحاز قاصروه ليه و جاب قضاة الشام و خلع السلطان جان بلاط و اتسلطن طومان باى مكانه بلقب العادل و بعدها طومان باى رجع مصر و هو متسلطن.

العادل طومان باى قبل ما يتسلطن كان محبوب جداً من عامة الناس لدرجة انه لما كان بيمشى فى الشارع كانت الستات بتزغرط له من شبابيك البيوت ، لكن بعد مااتسلطن اتغيرت طباعه و بقت تطلع منه افعال شنيعه منها خنقه للامير قاصروه بسبب شكه فى انه بيتآمر عليه ، و إكمن الناس كانوا بيحبوا قاصروه زعلوا من اللى عمله طومان باى و كرهوه من يوميها. الأمرا كمان حسوا بالخوف منه بعد ما خنق قاصروه و ما بقوش يثقوا فيه فخلعوه بقيادة قانصوه الغورى بعد ما حكم حوالى ميت يوم فهرب و استخبى منهم لكن عتروا عليه و قطعوا راسه.



[تعديل]عملاته و ألقابه

عملات العادل طومان باى نادره جداً و اتنقش عليها اسمه و ألقابه كده : " السلطان الملك العادل أبو النصر " و دعا " عز نصره ".